Non potho riposare amore, coro,

pessande a tie so donzi momentu;

no istes in tristura, prenda d’oro,

ne in dispiaghere o pessamentu.

T’assicuro ch’a tie solu bramo,

Ca d’amo vorte, d’amo, d’amo, d’amo.

  Amore meu, prenda d’istimare,

s’affettu meu a tie solu est dau.

S’are giuttu sas alas a bolare

milli vortas a s’ora ippo volau,

pro venner nessi pro ti saludare,

s’atera cosa nono a t’abbisare.

Si m’essere possibile d’angèlu,

d’ispiritu invisibile piccavo

sas formas e furavo dae chelu

su sole, sos isteddos e formavo

unu mundu bellissimu pro tene,

pro poder dispensare cada bene.

Amore meu, rosa profumada,

amore meu, gravellu olezzante,

amore, coro, immagine adorada,

amore, coro, so ispasimante,

amore, ses su sole relughente,

ch’ispunta su manzanu in oriente.

Ses su sole ch’illuminad a mie,

chi m’esalta su coro ei sa mente;

lizzu vroridu, candidu che nie,

semper in coro meu ses presente.

Amore meu, amore meu, amore,

vive senz’amargura, né dolore.

Si sa lughe d'isteddos e de sole,

si su bene chi v’est in s’universu

 are pothiu piccare ind una mole,

 comente palumbaru m’ippo immersu

 in fundu de su mare a regalare

 a tie vida, sole, terra e mare.

Unu ritrattu s’essere pintore,

 un’istatua ‘e marmu ti vachia

 s’essere istadu eccellente iscultore,

 ma cun dolore naro: “Non d’ischia”.

 Ma non balent a nudda marmu e tela

 In cunfrontu ‘e s’amore, d’oro vela.

Ti cherio abbrazzare ego e basare

 pro ti versare s’anima in su coro;

 ma da lontanu ti deppo adorare.

 Pessande chi m’istimas mi ristoro,

 chi de sa vida nostra tela e tramas

 han sa matessi sorte prite m’amas.

Sa bellesa ‘e tramontos, de manzanu

 s’alba, aurora, su sole lughente,

 sos profumos, sos cantos de veranu,

 sos zeffiros, sa brezza relughente

 de su mare, s’azzurru de su chelu,

 sas menzus cosas do a tie, anzèlu.